+
----
-صباح الخير مساء النور يا ست البيت
وست المكتب الفاتح على الجمهور
ختم الدولة جنبك هيبة قط لم تقبلى المصرور
حلال وبلال عليك يا أم مرتب بالتعب ممهور
وساعة رضاعة أجمل من سياحة شهور
النوم النوم نوم وتعال
النوم تعال سكت الجهـــال
اخر من تنومى وتقومى دغش بدرى قبل الشمس
ما تترك سرير النوم ويغادر عشتو العصفور
تحرسيها اللبينة تفور
تسوى الشاى يا ألاهى يا ألاهى كم من سندوتش فطور
للمتحنة والبهاتى جارى يحصل الطابور
وبرضو وراك مستنيك هم دفتر غياب وحضور
لفحنا العمة وخليناك بين الحلة والماسورة
رتبتى القميص والطرحة حفظتى النشيد والسورة
و التعب البخلى الصورة فى عينك أجمل صورة
ديك الحجلة وداك البلى ياما تشرى ياما تبلى
ما بتكلى ما بتملى ما بنقص حنانك ملى
هل هذا عمل مأجور
ممرضة سسترة ودكتورة
توب السهرة ابيض ناصع بين العنابر نور
مدرّسة حيث مدرستك
حنانك سور
كراريس الصبا الباكر .. تذاكر نحو بكرة مرور
سلاما عمتى الفراشة
المقشاشة جنبك كم بشوفة زهور
بت الشدة والوردية والمكنة التى ليلا ونهار تدور
تحت الشمس فى الحواشة
بين الحبة والزرزور
كليك كليك يا حلوة جمبك الكمبيوتر تكية
صبح الشاشة ياخد من عيونك نور
ام الكادحين وغلابة والعزابة
ست الكسرة أحب القرقريبة
القرقريبة .. القرقريبة قريبة فى أيدك فراشة تدور
والهبابة والعرق البنقط داك
زى قمرية تقوقي فوق السور
تغازل فى الضحى النقاع
عشة وميرى مدرسة الحياة المعمورة
لا كراس ولا سبورة
لا تقرير سمح رقاكي لا دبورة
تحيى تعيشى لا مقهورة لامنهورة
لا خاطر جناك مكسور بل مستورة
يا ذات الضرا المستور
سلاما يا غزالات العمل والبيت
ملاياتك ضفاف النيل
احب واديك .. هذا الحوش
أحب الشاى مع القرقوش
احب المستك الفواح
اهيم فى غمرة النعناع
بن ومدق وجمرو تسخن الايقاع
سلاماً يا نساء الارض قاطبة فى كل مكان