أنا من الذين يحبون قصائد الشاعر المرهف اسحق الحلنقي
احسست بان لي الرغبة في ان انثر لكم بعض قصائد الحلنقي
حتي نفي هذا الغامة الشامخه حقة الادبي
الشاعر اسحق الحلنقي من ابناء كسلا حي الحلنقة وينتمي
الي قبيلة الحلنقي وهي قبيلة حدودية بين ارتريا ومدينة كسلا
ولنبداء مع قصائده وهذه اول قصيده بعنوان الشمس
الشمس
صدق أمس ..
شفت الشمس
بضوى فى حفلة عرس
وطبعا ده اصلو المستحيل
تطلع شمس والدنيا ليل
لكن وحات وطنى الجميل
والخضره والظل الظليل
شفت الشمس بعيونى ديل
فى الحفلة بتغنى وتشيل
شفنا العريس قام قوًمها
حلف عليها وخصمها
بس رقصة واحدة تقدمها
واتدللت متبسمه ...
قامت عزيزه مكرمه ..
وبى خطوه حالمه منغمه
الخطوه جات متقسمه
خلت قلوبنا مقسمه ..
دى هديه جاتنا من السما
وحفلتنا بيها .. بنختمها
بت عم عبدالرحيم
24-12-2008, 11:46 PM
وانا اهدى قصيدة اسحق الحلنقى لكل أعضاء المنتدى عيدية بأثر رجعى
واقول ليكم ان شاء الله عيدتو لينا معاكم
الاعتزال اسحق الحلنقى
اعتزلت الناس عشانك
وقاسى كان الاعتزال
بس حكمنى قدر أفارقك
ضيع ايامى القلال
السؤال البكى عمرى
القى وين رد السؤال
ما فى عزة بدون معزة
وما فى عيد من غير هلال
اعتزلت انا ابتسامتى
ضحكتى وفرحة عيونى
العيون الكانو دايما
لما أغلط يعذرونى
ويبكو لو جيتم مفارق
بالمحنة يظللونى
والله يعلم بيها طيبتى
عذبوها وعذبونى
اعتزلت انا الاماسى
الكنت ريداوكنت سيدا
وكنت عش مليان محنة
للعاصفير لبريدا
وهسة ما لا الدنا صبحت
قاسية ما بترحم عنيدة
القساوة بقت قريبة
والمحنة بقت بعيدة
اعتزلت انا اسماحة
الكنت فى الازهار بشوفا
وقلت يا حليل الغناوى
عاندت صياد حروفا
يا حنان رقة مشاعرى
ويا جمال روحى الولوفة
حقو كان قلبك يقدر
غربتى وقسوة ظروفى
وليدادريس
24-12-2008, 11:56 PM
الفاروق اناايضا من عشاق ابن كسلا الحلقي ومن عشاق كسلا ايضا...ودي اروع ماقال الحلنقي رائعه التاج مكي..
حبــيــت عــشـانـكـ كـســلا
.............................................
ظلم الزمان الخاني يا ريتو لو كان خـــــــــانك
ليه جرت واتنكرتي ليه لي الساب ديارو عشانك
قدر عشانك كسلا
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
***
كلمني قوليها فاكر ليالي القــــــــــــــــــاش
لمن الحنين عاودنـــــــــي بعطفك الجــــياش
جفيت حبيب ما خانك من نور بسيمتك عاش
انا تاني ما بتلقاني يوم في طريقك مــاش
قاصد مكان في كسلا
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
***
صوت السواقي الحاني ذكرني ماضي بعيد
وعلى الرمــــــــــال آثارك طرتني ليلة عــيد
المني قلبك ينسا يرفس غــــــــــلاوة الريد
باقي الطريق بمشــــيهو خليني فيهو وحيد
والحب عذاب في كسلا
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
***
فرحــــــــــــت ليالي الريد نداوة البسمات
خلتني أبكى
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
***
الفاروق
25-12-2008, 12:34 AM
الاخت العزيزه بت عبد الرحيم تحيه واحترام الحلنقي مبدع القصيد السودانية
فحبك له يدل علي احساسك المرهف وقلمك يدل علي عقليتك النيرة
وليد ادريس ( الدنقلاوي -الامدرماني - الدكتور - الشاعر -الخ الخ الخ الخ
دائما ابداء فتبدع ويظهر ابداعك في روعت انتقاء الكلمات
الايستحق الحلنقي ان بكون لة فرع مستقل في هذا المنتدي الابي
الاخ العزيز الوليد بن ادريس الايستحق الحلنقي ان بكون لة
مكانة في هذا المنتدي
او ان نتتابع في كتابت قضائده علي هذا البوست
الوليد اكيد سمعتها عش معاى الحب عند ( حنان النيل - وجمال فرفور )
هذا للذكر لا للحصر
ود الجزيرة
25-12-2008, 02:24 AM
الفاروق سلام
وانت تفتح لنا نافذة من وطن الجمال
مع شاعر الطبيعة والحسان
انه الحلنقي
شاعر يغرد بلغات الطير
يحاحي عصافير الخريف
لك الشكر
ود شندى
25-12-2008, 03:46 PM
لك
الشكر اخى الجميل الفاروق وهذا الشاعر الانسان له كل الحب فقد اتحفنا
بالكثير الممتع وبالمناسبه هو مش شاعر اقابلك لوردى واعز الناس ولا انا
ذاكرتى خانتنى
الفاروق
05-01-2009, 02:30 PM
الي كل محبي الشاعر المبدع اسحق الحلنقي
سوف نجعل هذا البوست خاص بقصائد المبدع اسحق الحلنقي فقط
اقابلك هي احدي قصائد الحلنقي
أقابلك
في زمن ماشي
وزمن جاي
وزمن لسة
بشوف الماضي فيك باكر
أريت باكر يكون هسة
وقصر طول مشاويرنا
ورقش بالفرح جلسة على النيل
والقمر مرات يبين في الموج ويدسة
ونحن نقابلو زي طفلين
كلامم كلو بالهمسة
وزي عصفورة قلبها دابو حنة
وبالولف حسَّ
أي عيون بتتقابل
إلا عينيكي ما بتتفات
في عينيك بتوه
كيفن في حلاة البسمة في القاسيات
وعطر الصندل المستني
يفرح بيكي فرحتو جات
وحاتك خلي منو شوية
شان يتكاحل السمحات
بلاك النجمة
لا بتتعلا لا بتتدلا
فوقا هلال
عليكي الريدة طلي علينا
يالختينا فيكي آمال
تجينا فرح ترفرفي فوقنا
نستناكي بالموال
والشوق بيني بينك انتي
زي ماتقول نظرة طال
فارس
07-01-2009, 09:52 AM
عيش معاي الحب عيش معاي حناني
خليني أنسى سنين عشتهم وحداني
إيه يضرك تسأل يوم علي يا غالي
وإنت وحدك عارف همي عارف حالي
كيف أواصل صبري في الطريق الخالي
كيف بدونك تصبح اليالي ليالي
أنا كنت دايما ً بصبر مهما البعاد أضناني
في قلبي إنت بتكبر تكبر معاك معاني
برجى الأيام وستنى أمالي بين نيراني
والهجر مهما يألم يرجع حنانك تاني
لو كان جفيتني خليتني وحدي برايا
مع ليلي الوحدة والشوق حنينو معايا
ما بسيبو غرامك رضيان معاك بشقايا
وقت الطريقك يوصل أعرف نهايتة خطايا
فارس
07-01-2009, 09:54 AM
كنوز الدنيا
كُلُّ ما أحاول أذاكرْ
بلقى روحي وماني شاعِرْ
إني لعينيك فاكِرْ
ألقاك في نص السطور
بس تقول عنوان وظاهِرْ
وافضل أعيد في كلامِك وابتسامك
وأقضي ليلي في ذكراك مساهِر
***
كتير بفكّر أسيبو قربِكْ
وامشي كورس بعيد أهاجر
لكني بلقى صدود وجفوة
وصوت شديد في طبعو قاهر
يمنعني في هجْرِك أفكّر
أو يمُر بعقلي خاطر
***
***
ويوم ما كنتي عن الكورس غايبة
كان الضجر في عيوني ظاهر
وماني عارف كيف حأعمل
لمّ يكمل كورس الرابطة باكر
***
وفي كل لحظة بشوف عيونك
وفي المنام يا حلوة طيفك يجيني عابر
بأيه تفسري كل ديّه؟؟؟
تراني في تفسيرو حاير!!!
***
لو قلت ليك إحساسي حب
حأبقى زول كذاب وفاجر
بس بقول لو ممكن أبقى
صديق قريب ليكِ ومجاور
أصلو من عاداتي ديمّة
بعتـز بالأصحاب وافاخر
ولو بيقولوا معرفة الرجال كنوز
أنا بصداقتك راح أكون
لكل كنوز الدنيا حاكِر
فارس
07-01-2009, 09:55 AM
الراقي.......
أنا كنت في يوم بتساءل
كيف ممكن راقي أكون
هل يكفي لباس عالموضة
وعدسات توضع في عيون
تصفيف للشعر الأشقر
تنميق في الصوت وليون
كعويج في المشية تمايل
وأحاكي التلفزيون
*****
قول لي بالله يا صحبي
لو عاوز أصبح راقي
كيف ممكن يعني أكون
*****
أترك لكل عاداتنا
أظهر زي شعب أوربا
وأخلى عملنا المنتج
الليل أقضيه في الرّبة
أتعامل باستفزاز
من غير لا ذوق لا محبة
أترك لكل قيمنا
وأعيش تحقيق للرغبة
*****
قول لي بالله يا صحبي
لو عاوز أصبح راقي
كيف ممكن يعني أكون
*****
*****
لو أسمع زول ينصحني
أقول للزول براي
لو واحد جاني بفكرة
تنظيرو كتير (يااااي)
لا أقبل أصلو نصيحة
لا أغيِّر أبداً راي
أتعامل بس بسخافة
ما يهم الراح والجاي
*****
قول لي بالله يا صحبي
لو عاوز أصبح راقي
كيف ممكن يعني أكون
*****
الأكل يكون بالشوكة
والشعر يكون باروكة
أستعمل مايكرويف
وأنسى حكاية الدوكة
أعزف أورقن وكمان
وأكسر للدلوكة
أستحقر بيت الطين
ما أركب في الفلوكة
*****
قول لي بالله يا صحبي
لو عاوز أصبح راقي
كيف ممكن يعني أكون
*****
*****
أحمل موبايل باندة
وأسمي المولود رندة
ما أذكر اسم راكوبة
أعمل سراميك في برندة
أتنكر لي حارتنا
وما أصاحب ناس أم بدة
بيتنا في الحاج يوسف
وأقول ما بعرف الوحدة
*****
قول لي بالله يا صحبي
لو عاوز أصبح راقي
كيف ممكن يعني أكون
*****
أسمع لراغب وكاظم
لي نص الليل ما نايم
أجهل كل شيء عن ديني
وفي رمضان ما صايم
ما أصلي فرض لربي
فوق الشهوات بس هايم
ثقافتي فنون وملابس
باقي الأحداث ما عالم
*****
قول لي بالله يا صحبي
العاوز يصبح راقي
كيف ممكن يعني يكون
*****
*****
يكتب إي ميل في كرتو
ما يهم ما يقرا رسايلو
ويشيل (لاب توب) في يدو
وظيفتو يكون بس شايلو
يسوقلو كلب بجنبو
ويعجب بكل عمايلو
لو يدخل مسجد يصلي
يزعجنا نغم موبايلو
*****
قول لي بالله يا صحبي
العاوز يصبح راقي
كيف ممكن يعني يكون
*****
ما يعرف شيء عن جارو
دايماً مشغول في حالو
لا مرتو تزور جاراته
لا جارهم يخدمو عيالو
الدش شاغل أوقاتو
في القنوات كم جالو
ما فادهم شيء في دينهم
لكل مفاسد شالو
*****
قول لي بالله يا صحبي
أنا عاوز أصبح راقي
كيف ممكن يعني أكون
فارس
07-01-2009, 09:56 AM
أحْــلُـم.........
في عالمِ عِشقٍ زهريٍ
أحلم يوماً أن ألقاك
في لحظة سعدٍ تمتدٌ سنين
أحلم بالوعد الصادق
بجمالٍ يملأ أركاني
يحملني لذراك
***
أحلم أن أحضن تلك الشفتين
أن أروي ظمئي
من ماء الثغر وورد الخدين
أحلم أن تبقي فرحاً يسكنُ
طول العمر على صدري
يغمُرني يغرقني في بحر هواك
يا أجملَ حلمٍ
ما أروعُ أحلامي حين أراك
في لحظة صحوٍ أو غمضة عين
يا أجملَ حبٍ
كيف لقلبي يسمع عنكِ
ولا يهواك؟؟
والقلبُ قتيلٌ السمع
و سهم العينين
يا أجملَ أمنيةٍ
ما أجملُ نفسٍ تتمناك؟؟
كي تكمٌلَ في معناها وفي التكوين
جمالُ النفس يسكن ذات النفس
وجمالُ الكونِ لأن الكونَ حواك
***
أهواك ولا أدري طوعاً أم قِسراً أهواك!!!
أهواك إذا أحببتْ
وإذا قررتُ بجدٍ أن أنساك
***
وإذا امتلأت بئري
واخضّرت ساحاتي
وأتت كل ظباء الأرض لترعى
ستجدني أتطلّع لسماك
***
يا أشهق قمم الكون أمامي
هل لي يوماً أن أصل علاك؟؟
يا أحلى طعمٍ أرقبه
هل لي يوماً بمذاقِ حلاك؟؟
يا أروع أنثى أعرفها
قلبي يعشقك ونفسي تتمناك
***
كل السعد إذا اقتربت منك خطاي
وإذا بَعُدتْ مني خطاك... سألقى هلاك
***
قد تعبت في الأسفار ركابي
ما عادت نفسي تحتملُ خفاك
فسأدعو إله الكونِ بلا كللٍ
كي ترسى سفني في مرساك
فارس
07-01-2009, 09:57 AM
الريد جو قلبي بحبك بدا
ياطيبة حياتي يا قطر الندي
ما كان في خيالي تتنكر كدا
أيامن الجميلة ليه بتنكدا
جربت هواهم
قليبي انكوى
تاريهم جاروا
وماصانو الهوى
حاولت اسيبك واتناسى المضى
أيامك معاي ساعات الرضى
المكتوب علي أنا قلبي ارتضى
ياريت الليالي عطفو يعوضا
جربت هواهم
قليبي انكوى
تاريهم جارو
وماصانو الهوى
الكلمة الحنينة مشتاق اسمعا
روحي خلاص جفيتا والشوق لوعا
الدمعات
عيوني كيفن تمنعا
وانا شايف سنيني جورك ضيعا
جربت هواهم
قليبي انكوى
تاريهم جاروا
وماصانو الهوى
يومي الشفتك انت حسيت بالهنا
طويت يا حياتي شمعاتي انا
بعد الحب دا كلو يا أجمل منى
لي بكيتني تاني عاودت الضنا
جربت هواهم
قليبي انكوى
تاريهم جاروا
وماصانو الهوى
فارس
07-01-2009, 09:57 AM
وسط الدايرة أجمل نايرة
خلي قلوبنا تطير
وارحلي بينا فراشة حنينة
بين زينات وعبير
ولما الخصلة تدور طربانة
تبقي حرير في حرير
فرحي خلق الله واتّنّي ياشبه القمرة
وارقصي رشي عبيرك فينا وفتحي يا زهرة
أرقصي زيدي الساحة سماحة
نحن معاك نشيل
نغني غناوي ..نحكي حكاوي
لما ندوب في الليل
لا ترتاحي لا تريحينا
لسة الوقت طويل
عمرك كل فرح يا زينة
شيلي من الأفراح وادينا
راقصي البسمة راقصي النسمة
خلي الموجة تدور بينا
أوعي تهدي
كمان اتحدي
يلا جميلك تمي علينا علينا
فارس
07-01-2009, 09:58 AM
حبيت عشانك كسلا.....
ظلم الزمان الخاني يا ريتو لو كان خـــــــــانك
ليه جرت واتنكرتي ليه لي الساب ديارو عشانك
قدر عشانك كسلا
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
كلمني قوليها فاكر ليالي القــــــــــــــــــاش
لمن الحنين عاودنـــــــــي بعطفك الجــــياش
جفيت حبيب ما خانك من نور بسيمتك عاش
انا تاني ما بتلقاني يوم في طريقك مــاش
قاصد مكان في كسلا
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
صوت السواقي الحاني ذكرني ماضي بعيد
وعلى الرمــــــــــال آثارك طرتني ليلة عــيد
المني قلبك ينسا يرفس غــــــــــلاوة الريد
باقي الطريق بمشــــيهو خليني فيهو وحيد
والحب عذاب في كسلا
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
فرحــــــــــــت ليالي الريد نداوة البسمات
خلتني أبكى
حبيت عشانك كسلا وخليت دياري عشانها
واخترت ارض التاكا الشـــــــــاربه من ريحانها
فارس
07-01-2009, 09:59 AM
هـجرة عـصافير الـخريف
فـى مـوسم الـشوق الحلو
هـيج رحـيلا مـع الـغروب
احـساس غـلبنى اتـحملو
وكتمت اشواق الحنـيـن
داير الدموع يتـقـلـو
ورجعـت خليت الـدموع
يـنسابو ..مـنى ويـنزلو
ليـه يا عصافيـر الخريف
خضرة مـشاعـرى اشيلا صيف
تـحت الـغمام شـايف
مـواكب الـهجرة اتـلاشت سراع
ليه يـا عـصافير ليه الاسف
مين علمك أسف الوداع
وعارف دا ما اول سفر
لبلاد بـعيدة بـدون مـتاع
زى ما بتخافي مـن الرياح
بنخاف كمان انحن الضياع
ليه يا عصافير ليه الضنى
صفقة جناحك احزنها
غـايـب الـسنين الـليله
مالو غنا العصافير غـلبو
طراهو زولا كان ولوف
كم رضا خاطرو وطيبو
سمع قليبو كـلام حـنين
هـدهد مـشاعرو ودوبـو
الـناس سعيدم فى الـحياة
لا ضاق فراق لا جربو
وانا حالى فى بعد الوطن
دفـعنى ضي العين تمن
فارس
07-01-2009, 10:00 AM
يا راجياني وما ناسياني
ياما الغربة بتتحداني
وانا بتحدى الزمن الجاير
لو في بعدك
يتحداني
لمّ سحابة تلاقي سحابة
وتنزل منها دمعة عشاني
لمّ تلاقي مسافر عايد
تمشي وتسألي عن عنواني
وانا عنواني عيونك انتي
وأي مكان تمشيهو مكاني
يا راجياني وما ناسياني
ياما الغربة بتتحداني
وانا بتحدى الزمن الجاير
لو في بعدك
يتحداني
ياالفرهدتي فرح جواية
أنا جملتك بألواني
أنا علمتك تاخدي المعنى
من إحساسي وتدي معاني
أنا سافرت عشانك انتي
وسبت البلد الما ناسياني
كم حاولت أصارحك ياما
إلا العزة بقت مانعاني
يا راجياني وما ناسياني
ياما الغربة بتتحداني
وانا بتحدى الزمن الجاير
لو في بعدك
يتحداني
إستنيني ولو حاولت تصدي حناني
إستنيني ولو حاولت تصدي حنيني
ياما حتشقي ماظن تلقي
حِنيّن زيي يريدك تاني
ألأيام وانا قربك انتي
مهما تطول محسوبة ثواني
إنتي جمالك ياهو جمالي
وانتي زهورك من ريحاني
الأفراح بعرف ميعادا
وأي زمان تلقيهو زماني
يا راجياني وما ناسياني
ياما الغربة بتتحداني
وانا بتحدى الزمن الجاير
لو في بعدك
يتحدانى
فارس
07-01-2009, 10:01 AM
توعدنا وتبخل بالصورة
يا غنوتنا
يا بهجتنا
ويا مسا عيونا المبهورة
ما نحن بطبعنا ناس طيبين
غلطاتك عندنا مغفورة
يا نسمة في عز الصيف هبت
يا روح الروح
يا آمالا
إن جيت تطلبنا بضي العين
مابنقدر نحن نقول
لا لا
العين مابتعلا على الحاجب
وعزيز الروح مابتعالا
لو نحن بكينا على الصورة
سامح دمعتنا المعذورة
ما نحن بطبعنا ناس طيبين
غلطاتك عندنا مغفورة
الكلمة الحلوة الفي قلبك
وحياتك ماتعاند قولا
خلينا نصابح بيها العيد
نرحل لعوالم مجهولة
لو نحن مقامك ماقدرو
أعذارك عندنا مقبولة
روعة سحر الأسطورة
يا سمحتنا الما بنطولة
لو نحن مقامك ماقدرو
أعذارك عندنا مقبولة
بنحبك نحن وما قادرين
أبدا عن حبك نتخلا
نتخلا عن الوجه البشبه
ضي القمرة الناعس طلا
كل الآمال الل يخليك
ويحرسك من عين الناس الله
فارس
07-01-2009, 10:02 AM
دوري دوري
يا أيام يا أشواق عدينا
نحن الليلة للحبان
من سفرا بعيد جينا
على رمل الطريق من بيتنا
جابنا الشوق في سكتكم
وصح الذكريات فينا
مواكب الغيم لحارتكم
بعد ما قلنا نحن نسينا
ايه ذكرنا سيرتكم
وحاة عزتكم الفي قلوبنا
ياحلوين تطلونا
افتحو لينا احضانكم
بعد توادنا لمونا
قالو الفرقة بتغير
خايفين بكرة تنسونا
صبح رمل الطريق حزنان
عليهم متين تلاقونا
طفنا الحي مشيناهو
فوقنا سحابة حزنانة
هناك لاقونا ناس سألونا
إيه عاملين في دنيانا
وجات سيرتكم الحلوة
بأحلى عبير كريحانة
واخفت بينا ذكراكم
ودنياكم مفارقان
فارس
07-01-2009, 10:02 AM
يلا وتعال يلا
نهاجر في بلاد الله
ننسى الناس ينسونا
والله ننسى الناس ينسونا
وفوقنا الطيبة تتدلا
نعيش زي الطيور ماتعيش
وتفرد لجناها الريش
تضمنا عشة الريدة
ويفوت فوقنا الغمام تعريش
نفوت من سكة رواحة
ونتوه من واحة لواحة
شتيلة ريدنا يا حنين
يضون بهجة في الساحة
حلاوة الدنيا تلقاها
تجينا سحابة شايلاها
دروبنا تلم وريدنا يتم
وانت تقولي يا آهة
ونرتاح من كلام قالو
ومن عينو دمعتين سالو
آثار الهم نطويهو
نخلي الفرح بدالو
يلا وتعال يلا
نهاجر في بلاد الله
ننسى الناس ينسونا
والله ننسى الناس ينسونا
وفوقنا الطيبة تتدلا
فارس
07-01-2009, 10:03 AM
يا أعز الناس حبايبك نحن
زدنا قليل حنان
دا العمر زادت غلاوتو معاك
وصالحني الزمان
يا أحن الناس حنان
كنت من قبلك
بشيل الليل دموع
واطويه هم
انا كنت بخشى
على الأماني الطفلة
يفنيها العدم
وجيت لقيتك بين قلبي دموع
وغنيتك نغم
يا حبيب
ورد الأماني
الفي أعماقي فتح
وابتدا القلب
العاش العمر في آهاتو
يفرح
والزمن ماظنو بعدك انت
يرجع تاني يجرح
نامت أحزان عمري
غنى زماني
واتلاشت صعاب
أنا قبلك الأيام
قضيتا سراب
يسلمني السراب
وبيك طويت من عمري
صفحة ماضي مكتوب بالعذاب
فارس
07-01-2009, 10:04 AM
مشي امرك ياقدر انت احكامك مطاعه
لوحصل نحن افترقنا والليالي الهم اضاعا
همسة الذكرى المعاي تبقى زاد روحي ومتاعا
ــــــــــــــــــــــــــــــــــــــــــــــــــ ـــــــ
الزمن كان مبتسم والليالي جميله حالمه
كانت الايام بتمضي حلوه ريانه ومسالمه
لا اشتكينا من الزمن لا لا التقينا في لحظه ظالمه
بي حنانا الدنيا كانت ياحبيب العمر عالمه
ــــــــــــــــــــــــــــــــــــــــــــــــــ ـــــــ
فجأه من غير نحن نشعر يافراق طليت علينا
واصبحت كل الليالي الطيبه والايام حزينه
وارتيم ظل في جبين ايامنا ظل آهات سجينه
كان طريق مكتوب نسيرو نحن سرناهو ومشينا
ــــــــــــــــــــــــــــــــــــــــــــــــــ ـــــــ
عدت من بعدك رجعت عشت متغرب وحيد
وابتديت اشعر بزهر العمر يتساقط بعيد
ياحليلك انت والايام ربيع اخضر سعيد
كنت ببكي عليك بعمري والدموع بس ما بتفيد
فارس
07-01-2009, 10:05 AM
اسمعنا مره وحاتنا عندك اسمعنا مره
الدنيا تبقى مافيها مره
والكون يلالي بهجه ومسره
حن في عمرنا كايسنو مره
وان قلت لا لا هم واستمره
ـــــــــــــــــــــــــــــــــــــــــــــ
ان درنا نشكي وين نشكي ليكا
وين نلقى دنيا تجمعنا بيكا
كنت بتجينا ياحليل مجيكا
وان ضاع عمرنا محسوب عليكا
ـــــــــــــــــــــــــــــــــــــــــــــ
انت البتنهي وانت البتأمر
ان قلت نشقى نشقى وان قلت نصبر
زي الفراشه في سمانا تخطر
نادر وجودك في الدنيا يندر
ـــــــــــــــــــــــــــــــــــــــــــــ
نحن المشاعر جنات حبيبه
بسمتنا راحه وعالمنا طيبه
دايرين عيونك تصبح قريبه
شان كل حلوه في الكون نجيبا
فارس
07-01-2009, 10:05 AM
انت مافي .
. اي حاجة بتبقى مافي
الشمس تلقاها مافي
والبحر من غير مرافي
والمدن بتكون منافي
والحبيب يبقى جافي
العسل ما ببقى صافي
وانت مافي
انت مافي الروح تفارق
ويبقى موج النيل مفارق
الشروق ينسى المشارق
والنسيم لي الروض يشاهق
والصباح ما ببقى شارق
وانت مافي
انت مافي منو البسالم
ويبقى من الامو سالم
الزمن يصبح مظالم
والحنين يبقى ظالم
وتمسح الأحزان عوالم
تفتح الاحزان عوالم
وانت مافي
انت مافي الناس تغيب
والحبيب ينسى الحبيب
الدمع يصبح قريب
والطبيب ما ببقى طيب
كيف يكون في الدنيا طيب
وانت مافي
فارس
07-01-2009, 10:06 AM
مهما الزمن .. طلع قمر
وغيب قمر ما بجيب قمر يشبه عمر
كان مس بي ايده التراب يصبح درر
وكان حدثك ترحل بعيد لى دنيا ما دنيا بشر
شفتوهو كيف فى المؤتمر حرك شجون
القلبه منسوج من حجر الاعمي يوم داك ما نظر
والحسه ما بشعر شعر آه يا قدر امرك صدر
ماترشى ارضنا يا مطر وما تهدى موجك يا بحر
طال ما عمر تحت التراب الحلوة كان ضقناها مر
والسمحة كان جات ما بتسر وفرحنا بعد قصي عمر
كان وش سمح بي لمسته يداوى الجرح
كان طيبة فى الاعماق تلح كان حاله زين ما بدور شرح
تلقاهو دايما منشرح عقد الندي نفحة عبير عطر الطلح
للسمحه بسرع فى الخطا وفى القاسية ثابت ما بزح
كان الرجى وكان للحيارى المرتجى المستجد
كان بفتح ابواب النجا كان شعله بالحب الكبير متأججه
فى نظرته فى عزته ما بحجوا بيهو الناس حجا
الكلمة ما كان بيكونها وبيلونها وبحننها ويبجيبها ليك
تحلف عروسه متوجهة ... اخو فى القسي
والليلة خالد ياحليله يقول ابوى
وما بلقي غير صمت الاسى العزة ما كان حارسها
والسمحة ما كان فارسها كان مدرسة لى كل عظيم
التاكل يبكي عليك دموع تاجوج تنوح
شجر الاراك زابل فروع ومحلق اللابس الدروع
غرقان دموع والقمرة ما دايره الطلوع
الناس تئن حس النحاس يبكي ويرن
ومحمد الحافظ على العهد القديم صلى فى خشوع
لى الله يرحم جيتك فى آخرتك تكسب ثواب
ما كان بطل فى العز قدل كان المحارب فى كرن
وكان المناضل فى حروب ليبيا ومعارك كل زمن
كان حبه فى الدنيا الوطن من راحته من عافيته
كم دفع الثمن وياما الزمن ليهو اتمحن لكنو اجتاز المحن
ورايات معزته بالمفاخر هفهفن اخدر نحيف شامخ جبينه
كأنه سيف اعماقه حس فنان رهيف وكل دينه مصحف شريف
ماسد باب دقاهو ضيف فى الدنيا كم درج شقى وفرح ضعيف
الليلة عاينو الدنيا كيف حزنانه كيف
لابسه السواد شايله الرماد الليلة ما انكسر الجواد
يا حليل عيونه الصافيه كلها اعتداد
الناس يوصوا علي الصبر ويقولوا غايتو كلام معاد
كيف الصبر يا اخوانى عاد والكان بعلمنا الصبر خلانا فات
من غير ميعاد .
فارس
07-01-2009, 10:07 AM
أعذريني الدمعة ديّه...حتبقى آخر دمعة ليّه....
تاني لو قربت مني.....يبقى ليك الحق عليّ....
********************
أعذريني محال أعاود....تاني ريدتك وأمشي ليها..
ولا أرحل في عيونك....والطفولة الضاجّة فيها....
كيفك أريدك وانتي أصلك....ريدتي ما حسيتي بيها..
بالبعاد ما تعذبيني......أعذريني وأعذريني.....
*********************
ما قدرت مرة واحدة......بالغلط أغلط عليك.....
وانتي عمرك كلو ظالمة.....والدليل غفراني ليك...
عارفو قلبك ما معاي.....برضي شاغل قلبي بيك.....
بالحنان ما تعشميني......أعذريني وأعذريني.....
*********************
من زمان وأنا راجي منك....كلمة بيها تفرحيني.....
وانتي ما فرحت قلبي......كنت ديمة تجرحيني......
قسمة الزول ما بتفوتو....والبجيني معاك بجيني....
لو بكت منك عيوني......سامحيها وأعذريني
فارس
07-01-2009, 10:08 AM
على صفق العنب اسمين
كتبناهم بدمع العين
ومرت بينا غيم الفرقة
واتفارقنا مجبورين
ولما رجعنا من غربتنا
فرحانين مع العايدين
لقينا الريح محا الذكري
بكينا على ضياع اسمين
***
كتبناها الاسامي زمان
وتشهدى يا ضفاف النيل
طفولتنا القضيناها
زغاريد فرحة شاقة الليل
سنينا تضوى بي الامال
وكل العشناه زاهى جميل
وماشين فى دروب الريد
نغنى والاماسي تشيل
جاتنا الفرقة زايرة ديارنا
بى ليلا الى ما يندار
بقت فينا شالت زهرتا نضار
ساعة الدار
خلت بينا نار وشمعة
لاحظ شمعة يانوار
سواقينا الحزينة بكت
على الريد الولفنا زمان
****
كبرنا الليلة جينا نشوف
حكاية حزينة لى قلبين
كنا زمان رسمناهم
على صفق العنب اسمين
كنا زمان رسمناهم
على صفق العنب قلبين
على صفق العنب طفلين
قايلين نلقى ماضى الذكري
فوقنا يلالى زى نجمين
لقينا الريح محا الذكري
بكينا على ضياع اسمين
فارس
07-01-2009, 10:08 AM
الروح تروح ما مشكلة ..
تزيد جروحى علي جروح ما مشكلة ..
ينسى الفراش عطر الربيع ما مشكلة ..
ينسى الوديع صوت الوديع ما مشكلة ..
الشاري لو فكر يبيع لو ضاعت الاعمار تضيع ما مشكلة ..
لاتبين شمس لايهل قمر ما مشكلة ..
يبقى السحاب من غير مطر ما مشكلة ..
يرموني في نص البحر تجيبو لي الناس خبر ما مشكلة ..
لو هز صمت الليل برق ما مشكلة ..
والقاش رحل خلا الشرق ما مشكلة ..
لو عمري بالشوق يحترق لو رحت ما جبت الفرق ما مشكلة ..
الدنيا تبقى بدون جليس ما مشكلة ..
تبقى الليالي بدون ونيس ما مشكلة ..
وتنسى ليلى حبيبا قيس ما مشكلة ..
وتنسى العروس اسم العريس ما مشكلة ..
المشكلة
ريدتك بقت هى المشكلة
ادينى حل للمشكلة ..!
فارس
07-01-2009, 10:09 AM
جيناكم يا حبايبنا
بعد غربة و شوق
نغالب فيه ويغالبنا
ونكتم أهة
تظهر أهة
تتعبنا
حنين لشوفة الغالين
مدوبنا
هناك ما هنتنا يا حلوين
الهم بدل واحد يبين همين
وفيها قلوبنا
تتأوه ونتاوه
سنين وسنين
مصيره الحى يلاقى حبايبه
لو صادقين
سماع أهلا
من الاحباب شروق أمال
ووصف البهجة بالكلمات
محال يتقال
حلاوة العودة
غنيناها فى موال
تحكى عن الولف
واصلة الولف كتال
فارس
07-01-2009, 10:10 AM
بتتعلم من الايام مصيرك بكره تتعلم
وتعرف كيف يكون الريد وليه الناس
ليه ليه بتتــــالـــم
متين عرف الهوى قلبك
متين فاضت بااهات متين سهر
عيونك ليل طويله ساعات
وحاتك لسه مابتقدر تقاسم قلبى دقاتو
اقابلك وكلى حنيه واخاف من نظرتك لليا
واخاف شوق العمر كلو يفاجئك يوم فى عينيه
ورى البسمات كتمت دموع وبكيت من غير تحس بيا
وبكره وبكره الريد الريد بدون مواعيد يزورك
ياحياة عمرى وتقول ياريتنى لو حبيت
زمان من بدرى
وتعال تعال تعال فرح ليالينا وتعال قبل
السنين تجــــرى
فارس
07-01-2009, 10:11 AM
ليه يا كروان خليت عشك
باريت الغربة البتغشك
فارقت البلد البتريدك
بالصندل كانت بترشك
ليه يا كروان سبت ديارك
ومشيت خليتهم سمارك
دي الغربة الحتت نوارك
ما تسيبها تقلل مقدارك
دا البعد الحاصل كان منك
ليه نرمي اللوم على اقدارك
ليه يا كروان خليت ناسك
ومشيت للناس الماناسك
انت المعروف بين جلاسك
معروف بي رقة احساسك
ليه تنسى عيون النيل والليل
والريد الحابس انفاسك
ليه يا كروان بعدك طول
وما عاد تغريدك زي أول
انا عارفو حنينك ما تحول
عشق الأوطان ما بتاول
اصلو الانسان ما بكون انسان
لو بنسى قديم زمنو الاول
فارس
07-01-2009, 10:14 AM
يا حنين زي عش العصفور
معروش بالنور كله محبة
يا الشلت حلاة كل الحلوين
ما سبت وراك زول يتحب
***
يا حنين قلبي متين يرتاح
من بحر الريدة وأمواجا
والدمعة معاك تصبح شمعة
والزهرة كمان تلبس تاجا
لو سبت العين تتأمل فيك
ما بتاخد من حسنك حاجة
عينك للريد فيني مبين
يا حنين
***
يا حنين بيك الليل ضوا
رقة وإحساس طيبة وخوة
لو تعرف أصل الريد هو
لا سلطة بتحكمو لا قوة
وآه منو الريد لما يصيبك
بتغلغل في الأعماق جوة
***
يا حنين لما تسيبني تروح
الدنيا وراك تصبح آه
تبقى الأيام غير الأيام
والبهجة بتفقد معناها
أنا ليك بتقطر حنية
بتمنى بسيمتك ألقاها
ألقاها متين أنا ما عارفة
فارس
07-01-2009, 10:16 AM
الحاج يوسف
الحاضر والمستقبل
يا الحاج يوسف رمز الهمّة
بندورك ديّمة هناك في القمّة
وتكوني النور يا الحاج يوسف
يوم ما يكون العالم ضَلْمة
وتكوني مثال للعمل الشعبي
بفضل شبابك وقايدة الأمّة
ويجوك الناس ويهاجروا ليك
وتكوني فرج لكل ملمّة
وتقدِّمي للسودان أبنائك
ما انتِ بتحوي معادن جمّة
وكُل المدن الكاينة بحولك
تتخذِكْ مِشعَلْ كشف القمّة
ولمّ الناس تقيف تتساءل
قولي: أنا بشبابي بقيت في القمّة
وزي ما شبابك ليك بِعَمْلُو
بتقدمي ليهم أعظم خدمة
بتقيفي حنينة في يوم يحتاجو
وقفة أُمْ وخالة وعمّة
فارس
07-01-2009, 10:17 AM
إنت يا الأبيض ضميرك
صافي زي قلب الربيع
في كلامك وابتسامك
أندي من زهر الربيع
عشت متهيئ لحبك
كل أيامي وحنانها
ابتسامك عزيزة
بحرق الآهات عشانا
بس لقيتك إنت حائر
تظلم الحب بالمهانة
الدموع السايلة مني
يا ما سالت حرقتني
والظنون الحارقة قلبي
بالماسي كم شقتني
كنت بجني شقاك محنة
وأعشق أوهامي الطوتني
فارس
07-01-2009, 10:19 AM
كي ترسى سفني في مرساك
الريد جو قلبي بحبك بدا
ياطيبة حياتي يا قطر الندي
ما كان في خيالي تتنكر كدا
أيامن الجميلة ليه بتنكدا
جربت هواهم
قليبي انكوى
تاريهم جاروا
وماصانو الهوى
حاولت اسيبك واتناسى المضى
أيامك معاي ساعات الرضى
المكتوب علي أنا قلبي ارتضى
ياريت الليالي عطفو يعوضا
جربت هواهم
قليبي انكوى
تاريهم جارو
وماصانو الهوى
الكلمة الحنينة مشتاق اسمعا
روحي خلاص جفيتا والشوق لوعا
الدمعات
عيوني كيفن تمنعا
وانا شايف سنيني جورك ضيعا
جربت هواهم
قليبي انكوى
تاريهم جاروا
وماصانو الهوى
يومي الشفتك انت حسيت بالهنا
طويت يا حياتي شمعاتي انا
بعد الحب دا كلو يا أجمل منى
لي بكيتني تاني عاودت الضنا
جربت هواهم
قليبي انكوى
تاريهم جاروا
وماصانو الهوى
فارس
07-01-2009, 10:22 AM
دا القدرت اجيبو يا الفاروق
وهذا جزء قليل من ابداعات الشاعر الكبير اسحاق الحلنقي ابن كسلا الخضراء
خليل ابراهيم
07-01-2009, 10:41 AM
الشمس
صدق أمس ..
شفت الشمس
بضوى فى حفلة عرس
وطبعا ده اصلو المستحيل
تطلع شمس والدنيا ليل
لكن وحات وطنى الجميل
والخضره والظل الظليل
شفت الشمس بعيونى ديل
فى الحفلة بتغنى وتشيل
شفنا العريس قام قوًمها
حلف عليها وخصمها
بس رقصة واحدة تقدمها
واتدللت متبسمه ...
قامت عزيزه مكرمه ..
وبى خطوه حالمه منغمه
الخطوه جات متقسمه
خلت قلوبنا مقسمه ..
دى هديه جاتنا من السما
وحفلتنا بيها .. بنختمها
لكم مودتي
فارس
07-01-2009, 11:09 AM
يا خليلو
ديل انا كتبتهم
مافي داعي للتكرار
ولو في غير الكتبناهو ادينا ليهو
الفاروق
08-01-2009, 02:57 AM
الحلنقي:
اغنياتي صنعت نجوماً ولم تسقط في وحل الركاكة والنسيان
حصاد غربتي مثل صفعة من كف خادم على وجه سيد أصيل..!
اسحق الحلنقي..رديف الاغنيات العذبة ومحرر الشجن العذاب، كفاه ان كتب يوماً:
لو وشوش صوت الريح في الباب
يسبقنا الشوق قبل العينين
عاد من غربته بوعد جميل، هو تحرير الاغنية من أسر الكآبة، وتخليص أحبائه
من (لبلاب) الحزن الدامي الذي يتسلق اشجار الغناء في دوحة المحبين..
وزع الحلنقي شعره بالقسطاط بين اساطين الغناء في السودان من لدن الموسيقار
محمد وردي مروراً الى جيل جمال مصطفى فرفور .. كتب للاطفال: ''انا بدري
صحيت من نومي'' ففازت بجائزة مهرجان اغنية الاطفال بالاردن واجترح لوردي
مقابلة من نوع فريد:
'' أقابلك في زمن ماضي ..
وزمن جاي وزمن لسه
أشوف الماضي فيك باكر
أريت باكر يكون حسه..!
هو الحلنقي وكفي...
حوار: نشـأت الإمـام
* من أنت؟
ـ أنا المحلق في زمن لم يعد يؤمن بوجود تاجوج..!
مغرم بالبحث عن حدائق كسلا المعلقة بين خيط من ضياء وخيوط من خيال..انتظر اللحظة التي ينهزم فيها الخنجر امام حنية الوردة...
ابحث عن نفسي الشاعرة بين نفوس لا لون لها, فالنفس السوداء يمكن ان تتحول
في لحظة غفران الى بياض, اما البيضاء, فهي لا تحتمل الا ان تكون ابيضاً.!
* لماذا وكيف يكتب الحلنقي القصيدة؟
ـ كيف تلون الفراشة اجنحتها, وكيف تبرق اللؤلؤة, وكيف تيمم زهرة العباد وجنتيها الى الشمس بحس عفوي؟
هكذا انا..قدري ان اكون شاعرا اكتب في الوقت الذي اريد دون حاجة الى مخاض او يجتاحني فيضان عاطفي..!
فقط احتاج ان تمدني حبيبتي التي تسكن دواخلي زهرة حمراء..!
* لماذا اختار الحلنقي كتابة القصيدة؟
ـ لم اختر كتابة القصيدة..القصيدة هي التي اختارتني.
* من المؤدي الذي اعطى اغنياتك طعما ولونا ورائحة؟
ـ هو الفنان الراحل العاقب محمد حسن في اغنية ''جابتني الظروف'', فقد منحها العاقب تكريماً حقيقياً وأعلى من كعب الروح فيها.
* ومن الفنانين الشباب؟
ـ منذ ان تعاطيت الشعر في صغري لم اتعامل مع اسماء او نجوم, فقط أهتم بمن
يغوص في لجة البحار لينتخب لؤلؤاً يضيئ ظلمة الانفس والظنون.
* بين ''عصافير الخريف'' و''تتعلم من الايام'' وكل رائعات الزمن الجميل وما ينتجه الحلنقي الآن بون شاسع، هل توافق؟
ـ كتبت 180 اغنية تمشي بيننا ولم تسقط في وحل النسيان والركاكة بشهادة
مدير الاذاعة, واغنياتي صنعت نجوماً, لذا انفي الاتهام لان الذي كتب
عصافير الخريف في عمر ربيعي يمكنه ان يكتب الاجمل.
* ـ ما مشكلة.. قصيدة ركيكة، فمن اي باب في مدينة الشعر دخلت؟
ـ احيانا اتعمد ان اصنع اغنية اداعب بها اصدقائي حتى اضمن لهم خلاصا من
حائط المبكى التي تعودت ان تنام عليه اغنيات هذا الزمن الجارح الذي لم يعد
صالحاً لزراعة الورد, فكانت : ''ما مشكلة''.!
* اذن اين تكمن ''المشكلة''.. في الملحن ام المؤدي؟
ـ الحلنقي الذي كتب '' اقابلك'' لمحمد وردي, هو الذي كتب ''مشكلة'' فرفور,
ولايمكن لفنان ان يغير لون عينيه او ما بنفسه من جمال الى اطلال من خيوط
العنكبوت.. شاهدي على ذلك, اغنية ''اعذريني'' التي ما تغنى بها سيف
الجامعة في محفل, الا الهبت الاكف وحرقت المشاعر..!
* الا تعتقد ان اغنية ''مشكلة'' موغلة في الذاتية في ظل مشاكل عديدة تحيط بالواقع وانت تزعم بانك لسان الامة؟
ـ انا بمثابة ابتسامة تحاول الوصول الى مطاحن الانين في الاعماق البيضاء
لتمسح عنها الالم..لم اكن يوما بعيدا عن جراحات بلدي وآلامه بدليل وقفتي
في مسارح نيالا والقضارف والدمازين لأقرأ شعراً لاحبابي, فأنا ابحث عن
المفاتيح المغطاة لأضيئها بالكلمة الحلوة لتشع من جديد..!
* هل حدث ان مزق الحلنقي مسودة اغنية؟
ـ نعم.. هي اغنية ''إذا'' التي تقول:
إذا مرت ثواني علي
أحس بي عمري ما موجود
مزقتها لاني كنت لحظتها مثل شجرة السنديان, أخضر من الخارج, أجوف من الداخل..!
* تغزل الحلنقي دررا في مدن الخليج ولم يفعلها في السودان، هل لانها غبراء وتلك صقيلة؟
ـ كتبت قصائدي في مدينة العين الاماراتية, لانها تشبه حبيبتي كسلا.. ولا تسألني عن الاخريات.!
* هل عاد الحلنقي من الغربة يسبقه الاحمال والطنافس؟
ـ حصاد غربتي مثل صفعة من كف خادم على وجه سيد أصيل..!
الحلنقي لم يعد من الغربة الا بعصاة من الذكريات يتوكأ عليها في شوارع بيت
المال..الغربة اخذتني ربيعاً ورمت بي تحت حوافر الايام جواداً مكسور الساق
يبحث عن رصاصة الرحمة.. قد يجدها أو لا يجدها..!
* هل لك ان تحكي قصة اول نص من الحلنقي وجدت طريقها لفنان ثم المستمع وكانت جوازا لمرورك في دولة الاغنيات؟
ـ لم تكن اغنية واحدة, بل مثلث برمودا عاطفي يتكون من (ساعة الغروب)
للمطرب ابراهيم حسين, و(الابيض ضميرك) للطيب عبد الله, و(حبيت عشانك كسلا)
للتاج مكي..
*لكنك بالتأكيد تميل لواحدة منها.. اليس كذلك؟
ـ والله ممكن تقول (الابيض ضميرك).. لانها كانت الاكثر تألقاً.
* من هي الاكثر تألقاً.. الاغنية ام صاحبة الضمير الابيض؟
ـ الابيض..!
* كيف؟
ـ تاريخ الشعر كله عندي ابيض.. انا لا احب من يصفون الماضي بالسواد.
* لم تجب على سؤالي بعد يا استاذ؟
ـ انا شعري مثل النسيم.. من حق اي كائن ان يستنشقه ولا احب التخصيص.
* وماذا عن كسلا؟
ـ لو لم تكن كسلا لما كان الحلنقي.. لانها المدينة التي جعلت من دواخلي بساتين نضيرة تسمح للنسور الجارحة ان تتفيأ بظلالها..!
الفاروق
08-01-2009, 09:38 AM
اسحق
الحلنقى .... كلما اسمع هذا الاسم يتملكني شعور بالأشياء الجميلة ..فراشات
تحلق حول الازاهر عصافير ملونة فرحة تطير هنا وهناك فهو فنان الطبيعة
بسحرها وجمالها .. ويتبين ذلك في انتمائه..لطبيعة كسلا البكر .. ومدني
الجميلة فهو فنان شفاف تأتيه المفردة حينما يودها فثراه الوجداني وموهبته
الكتابية ديدنه في الكتابة دوماً
ابدع الحلنقي في "الابيض ضميرك" التي شدي بها المبدع الطيب عبد الله
و"البلوم في فرعه غنى" التي غنانا بها الراحل الجابري
وتأثرني هذه الأبيات من اغنية "بتتعلم" التي اكتملت لوحتها حينما شدى بها الموسيقار محمد الأمين
متين عرف الهوى قلبك
متين فاضت بآهاته
متين سهّر عيونك
ليل طويلة ساعاته
وحاتك لسا ما بتقدر
تقاسم قلبي دقاتو
ومصيرك
بكرة
الفاروق
30-01-2009, 10:19 AM
وينك يا فارس من يوم ما مشيت
واسحق واقف منتظرك
انشاء الله تنجح يارب
الفاروق
02-11-2009, 12:24 AM
بجد يا فارس كنت عامل شغل حلو مع القمه اسحق
اريتك ترجع وتواصل ابداعتك مع المبدع اسحق الحلنقي
وتكتب لين الجديد والاخير من قصائد الهرم
جراح
02-11-2009, 08:56 AM
الفاروق سلام
يكفينا اننا ممرنا ببستانك وقطفنا منه اجمل الورود وهديناها
نعم انه قامة تستحق الثناء انه مرهف الاحساس جميل الكلمة نقي السريرة
وكما قال :
شفنا العريس قام قوًمها
حلف عليها وخصمها
بس رقصة واحدة تقدمها
واتدللت متبسمه ...
قامت عزيزه مكرمه ..
وبى خطوه حالمه منغمه
الخطوه جات متقسمه
خلت قلوبنا مقسمه
لك التحية استاذي الفاروق على الروعة
الفاروق
06-11-2009, 01:07 AM
الاخ جراح سلام
تسلم علي المرور
كلك زوق
طيب ماتتكرم لين كدا بغنيه هديه
عارفك فنان في الروابط
نزل لين رابط كدا نربط بيه ود امي
جراح
06-11-2009, 11:53 AM
الاخ جراح سلام
تسلم علي المرور
كلك زوق
طيب ماتتكرم لين كدا بغنيه هديه
عارفك فنان في الروابط
نزل لين رابط كدا نربط بيه ود امي
مليون سلام ليك يالفاروق
وبالجد ختيتني في مطب ضيق المهم انا بديدك قصيدة جميلة لها ارتباط بك وبي بياض ضميرك وتغنى بيها الاستاذ الطيب عبد الله
إنت يا الأبيض ضميرك
صافي زي قلب الربيع
في كلامك وابتسامك
أندي من زهر الربيع
عشت متهيئ لحبك
كل أيامي وحنانها
ابتسامك عزيزة
بحرق الآهات عشانا
بس لقيتك إنت حائر
تظلم الحب بالمهانة
الدموع السايلة مني
يا ما سالت حرقتني
والظنون الحارقة قلبي
بالماسي كم شقتني
كنت بجني شقاك محنة
وأعشق أوهامي الطوتني
وبرضو كرم مني اديك اغنية جميلة من اغاني الاستاذ الحلنقي
[ندعوك للتسجيل في المنتدى أو التعريف بنفسك لمعاينة هذا الرابط]
الأربعاء مارس 03, 2010 4:38 pm
.gif ".::المدير العام::.")
